мыйзам

КЫРГЫЗ-ТҮРК “МАНАС” УНИВЕРСИТЕТИНИН ИЛИМИЙ ИЗИЛДӨӨ ИШТЕРИНЕ КОЛДОО КӨРСӨТҮҮ БОЮНЧА НУСКАМАСЫ

Максаты 

1-берене. Бул нускаманын максаты – Кыргыз-Түрк “Манас” университетинде толук айлык акы менен иштеген окутуучулардын эл аралык мезгилдүү илимий журналдарда жарыялаган макалалары, өлкө ичинде жана чет өлкөдө уюштурулган конгресстерде, симпозиумдарда ж.б.у.с. илимий иш-чараларда жасаган докладдары менен Кыргыз-Түрк “Манас” университетинде өткөргөн илимий иш-чаралары үчүн үчүн берилүүчү каржылык колдоонун тартибин аныктоо. 

Мазмуну

2-берене. Бул нускама Кыргыз-Түрк «Манас» университетинин Илимий изилдөө иштерин колдоо кеңешинин түзүмүн, милдеттерин, илимий басылмаларды жарыялоо, илимий иш-чараларды уюштуруу жана аларга катышуу үчүн берилүүчү колдоолорду жана арыз тапшыруу тартибин камтыйт. 

Аныктамалар жана кыскартуулар

3-берене. Бул нускамада төмөнкүдөй түшүнүктөр колдонулат: 

Илимий изилдөө иштерин колдоо  кеӊеши 

4-берене. ИИИКК университетте толук айлык акы менен иштеген окутуучулардын ичинен Окумуштуулар кеңеши тарабынан дайындалып, төраганы кошкондо 5 (беш) кишиден турат. Кеңеш мүчөлөрүнүн кызмат мөөнөтү – 1 (бир) жыл. Кеңештин жыйындарына жүйөлүү себепсиз жана катары менен 3 жолу катышпаган кеңештин мүчөсү мүчөлүктөн чыгарылат. Кеңеш мүчөлүгүнүн мөөнөтү аяктаган, кеңештин курамынан чыгып кеткен же университетте кызмат мөөнөтү аяктаган мүчөнүн ордуна калган мөөнөткө ушул эле ыкма менен жаңы мүчө дайындалат.

ИИИКК зарыл учурларда кеңеш төраганын чакыруусу менен чогулат. Кеңештин чечимдери көпчүлүк добуш менен кабыл алынат жана ректораттын макулдугуна сунушталат.

Илимий изилдөө иштерин колдоо кеңешинин милдеттери

5-берене. ИИИККнын милдеттери төмөнкүдөй:

1. Илимий изилдөө иштерине колдоо көрсөтүү боюнча нускаманын алкагында арыз формасын даярдоо, арызга тийиштүү бардык иш-аракеттерди жүргүзүү жана аларды жыйынтыктоо;

2. Колдоо критерийлерин аныктоо жана жакшыртуу;

3. Арыздарды карап чыгып, колдоого татыктуу басылмаларды аныктоо жана ректораттын макулдугуна сунуштоо;

4. Илимий жыйындарда жасала турган докладдарды карап чыгып, алардын ичинен колдоого татыктуу докладдарды аныктап, аны ректораттын макулдугуна сунуштоо; 

5. Университетте уюштурулган илимий иш-чараларды карап чыгып, колдоого татыктуу иш-чараларды ректоратка сунуштоо;

6. Жыл сайын январь айынын аягына чейин илимий басылмаларга жана иш-чараларга колдоо алуу үчүн негиз боло турган сумманы аныктоо жана бюджеттен каржылана турган болжолдуу жалпы сумманы ректоратка сунуштоо.

Илимий изилдөө иштерине көрсөтүлүүчү колдоонун суммасы

6-берене. Web of Science (Wos) маалымат базасындагы Science Citation Index Expanded (SCIE, Social Science Citation Index (SSCI), Arts and Humanities Citation Index (AHCI) журналдарында жарыяланган обзордук же изилдөө макалаларына колдоо көрсөтүлөт. Берилүүчү колдоонун суммасы журнал же макала жарыяланган жылдагы Wos (Quartile) классификациясы боюнча жыл сайын ректорат тарабынан аныкталат. Wos (Quartile) классификациясына кирбеген AHCI журналдарында жарыяланган макалалар Q3 Wos категориясында кабыл алынат.

Жарыяланган обзордук макала жана макалага берилүүчү колдоонун көлөмү 1-таблицада көрсөтүлгөн суммадан ашпоого тийиш. Бул колдоонун суммасы тийиштүү басылмада аты-жөнү жазылган авторлорго тең бөлүштүрүлөт.  

1-таблица. Жарыяланган обзордук макала жана макала үчүн берилүүчү максималдуу колдоонун көлөмү

Илимий изилдөө иштерине колдоо алуу үчүн арыз тапшыруу шарттары

7-берене. 

1. Окутуучулар арыздарын өздөрү иштеген түзүмгө макала жарыяланган күндөн тарта эки жыл ичинде тапшырышы керек. Арыздар ИИИКК тарабынан даярдалган “Илимий изилдөө иштерин колдоо боюнча арыз формасы” менен кошо тийиштүү бөлүм башчылыгы/ деканат/ мүдүрлүк тарабынан ректоратка сунушталат. 
2. Илимий эмгекти басып чыгарууга колдоо алуу үчүн:

1. Окутуучу толук айлык акы менен иштөөгө милдеттүү;
2. Макаланын толук тексти SCIE, SSCI жана AHCI базаларында  орун алган журналдарда жарыяланышы керек;  
3. Макаланын толук тексти жана Q категориясы тууралуу документи арыз формасы менен тиркелип берилиши керек (AHCI үчүн бул документ талап кылынбайт); 
4. Макалада Кыргыз-Түрк “Манас” университетинин дареги көрсөтүлүшү шарт.

Илимий жыйындарга катышуу үчүн колдоо алуу шарттары

8-берене. 

1. Арыздар окутуучу иштеген түзүмгө ИИИКК тарабынан даярдалган “Илимий жыйындарга катышуу үчүн колдоо алуу боюнча арыз формасы” менен бирге илимий жыйын өткөрүлүүчү күнгө чейин кеминде бир ай мурун тапшырылат. 
2. Университет тарабынан жол акысы жана/же күнүмдүк чыгымдары каржыланган иш сапарлары тийиштүү түзүмдүн башкаруу кеӊешинин сунушу, университеттин башкаруу кеӊешинин чечими жана ректораттын бекитүүсү менен ишке ашат.
3. Иш сапарга байланыштуу чыгымдары каржыланган кызматкерлердин бир жылдык келишим мөөнөтүнүн ичинде бир жолу чет өлкөдөгү иш сапарлары үчүн эң көп беш күндүк, өлкө ичиндеги иш сапарлары үчүн эң көп үч күндүк жол киресинин жана күнүмдүк чыгымдарынын 80%ы университет тарабынан төлөнүп берилет. 
4. Окутуучунун өлкө ичиндеги жана чет өлкөдөгү илимий жыйындарга катышуу үчүн барган иш сапары университеттеги аткарган милдетине тоскоолдук жаратпасы жана ага кеткен убакыттын ордуна иштеп берери отчет түрүндө тийиштүү бөлүм башчылыгынын сунушу менен тийиштүү түзүмдүн жетекчилиги тарабынан билдирилет.  
5. Өлкө ичиндеги жана чет өлкөдөгү илимий жыйындарга катышуу үчүн  иш сапарга кеткендер кайтып келген күндөн тарта кийин 15 күндүн ичинде илимий жыйынга катышкандыгы тууралуу документин жана отчетун тийиштүү түзүм аркылуу ректоратка тапшырышат. 
6. Илимий даражасына ээ окутуучу жылда бир гана жолу өлкө ичиндеги жана чет өлкөдөгү жыйындарга катыша алат. 
7. Илимий иш-чарага катышуу үчүн колдоо алуу шарттары:

1. Окутуучу университетте толук айлык акы менен иштеши керек; 
2. Илимий жыйында оозеки доклад жасашы керек; 
3. Илимий жыйынды уюштуруучулар тарабынан докладдын кабыл алынгандыгы тууралуу документ берилиши керек;
4. Илимий жыйынга катышкандардын жарыялана турган докладдарынын аннотациясында же толук текстинде Кыргыз-Түрк “Манас” университетинин дареги көрсөтүлүшү керек;
5. Талапкердин табигый жана медициналык илимдер боюнча SCIE, SSCI, AHCI жана ESCI базаларындагы индекстүү журналдарда, коомдук илимдер боюнча SCIE, SSCI, AHCI, ESCI жана Scopus базаларындагы журналдарда өткөн жылда жарыяланган кеминде бир обзордук же изилдөө макаласы болушу керек.

Илимий иш-чараны уюштуруу үчүн колдоо алуу

9-берене. 

1. Университетте уюштурулган төмөндөгү иш-чараларга колдоо көрсөтүлөт:

1. Университетте уюштурулган улуттук жана эл аралык конгресс, коллоквиум, симпозиум, конференция, панель жана воркшоп сыяктуу илимий иш-чаралар;
2. Университет кызматташкан өлкөлөр менен илимий-техникалык кызматташтыкты өнүктүрүүгө багытталган биргелешкен илимий долбоорлорду иштеп чыгуу жана кызматташтыктын артыкчылыктуу багыттарын аныктоо максатында университет тарабынан уюштурулган улуттук жана эл аралык семинарлар, панелдер, воркшоптор жана жыйындар;

2. Ректорат тарабынан жана ректораттын бекитүүсү менен түзүмдөр тарабынан уюштурулган конференцияга, панелге, коллоквиумга, воркшопко, семинарга жана жыйынга чакырылган кыргызстандык/ чет элдик баяндамачылардын жол кире, мейманкана жана тамак-аш чыгымдарына, плакат, кулактандыруу, брошюра, иш-чаранын программасы, бейджик, ксерокөчүрмө, канцелярдык товарлар менен кофе-брейктерге байланыштуу чыгымдарга колдоо көрсөтүлөт.
3. Университетте уюштурулган улуттук жана эл аралык илимий конгресске жана симпозиумга чакырылган кыргызстандык/ чет элдик баяндамачылардын жол кире жана мейманкана чыгымдары, докладдардын/ аннотациялардын жыйнагы, басып чыгаруу иштери, плакат, кулактандыруу, брошюра, иш-чаранын программасы, бейджик, илимий жыйынга катышкандыгы тууралуу сертификат, ксерокөчүрмө, блокнот, калем чыгымдары, ачылыш жана жабылыш аземдеринде сый тамак, чет өлкөлөрдө жарнамалык иш-чаралар, кофе-брейк, иш-чаранын жүрүшүндөгү катчылык жана иш-чараны уюштурган кишинин координациялык иштерине байланышкан чыгымдар боюнча колдоо көрсөтүлөт.   
4. Илимий иш-чаранын аяктаганына байланыштуу катты эң кеч үч ай ичинде ИИИККга жиберүү керек.

Илимий иш-чараны уюштуруу үчүн колдоо алуунун шарттары

10-берене.

1. Түзүмдөр уюштура турган конференциянын, панелдин, коллоквиумдун, воркшоптун, семинардын жана жыйындын маңызын, өткөрүлө турган күнүн, себептерин жана катышуучулардын тизмесин тийиштүү башкаруу кеңешинин чечими менен ректоратка эң кеч 20 күн мурун жиберет. Бул иш-чаралардын ичинен ИИИКК тарабынан колдоо берилүүсү туура көрүлгөн иш-чаралар аныкталат жана ректоратка сунушталат. ИИИКК бериле турган колдоолордун түрлөрүн жана көлөмдөрүн ректоратка сунуш кылат. Колдоолор университеттин Башкаруу кеңешинин макулдугу боюнча көрсөтүлөт. 
2. Университетте толук айлык акы менен иштеген окутуучулар уюштура турган улуттук жана эл аралык илимий конференциялардын жана симпозиумдардын программасын тийиштүү түзүмдүн башкаруу кеңешинин чечими менен ректоратка сунуштайт. Ректорат макулдук берген учурда, университеттин Стратегиялык пландоо башкармалыгынын көзөмөлү астында конгресстерге жана симпозиумдарга катышуу төлөмдөрү төлөнө турган эсеп ачылат. ИИИККнын макулдугу, университеттин башкаруу кеңешинин чечими менен конгресске жана симпозиумга байланыштуу чыгымдар катышуу төлөмдөрүнүн эсебинен төлөнөт. Катышуу төлөмдөрү жетишсиз болгон учурда тийиштүү иш-чарага бул берененин 1-пунктунда көрсөтүлгөн ыкма боюнча колдоо көрсөтүлүшү мүмкүн.

Башка жоболор

11-берене.

1. Илимий иш-чарага катышуу үчүн башка булактардан каржылык колдоо алгандарга бул жобонун алкагында колдоо көрсөтүлбөйт. Илимий изилдөө иштерин колдоо боюнча университеттен колдоо алгандардын башка булактардан да каржылык колдоо алгандыгы аныкталса, университет көрсөткөн колдоонун суммасы 20% ашыгы менен кайтарылып алынат.
2. Бир басылма үчүн бир гана жолу колдоо алууга болот. Эгерде бир басылма үчүн эки жолу колдоо алынганы аныкталса, көрсөтүлгөн колдоонун суммасы 20% ашыгы менен кайтарылып алынат жана дисциплинардык териштирүү жүргүзүлөт.
3. Илимий иш-чарага катышуу үчүн колдоо алса да, жүйөлүү себепсиз иш-чарага катышпаганы аныкталса, берилген колдоо кайтарылып алынат жана кийинки 3 жыл бою ИИИККдан колдоо алуу үчүн арыз тапшыра албайт.
4. Арыздарга тиешелүү университеттин Башкаруу кеңешинин чечими акыркы болуп, ага даттанууга болбойт.

Күчүнө кириши 

12-берене. Бул нускама Кыргыз-Түрк “Манас” университетинин Камкорчулар кеңеши тарабынан кабыл алынган күндөн баштап күчүнө кирет жана 2017-жылдын 22-декабрындагы 2017-02/8-номерлүү Камкорчулар кеңешинин чечими менен күчүнө кирген КТМУнун “Илимий изилдөө иштерине колдоо көрсөтүү боюнча нускамасы” өз күчүн жоготот. 

Ишке ашырылышы

13-берене. Бул нускама  Кыргыз-Түрк “Манас” университетинин ректораты тарабынан ишке ашырылат.

Бул нускама Камкорчулар кеңешинин 2022-жылдын 28-декабрындагы 2022-01/3- номерлүү чечими менен кабыл алынган.

Бул нускама Камкорчулар кеңешине сунуштоо үчүн Окумуштуулар кеңешинин 2022-жылдын 14-апрелиндеги 2022-11.33(а)-номерлүү чечими менен кабыл алынган.

Бул нускама Камкорчулар кеңешине сунуштоо үчүн Окумуштуулар кеңешинин 2021-жылдын 3-ноябрындагы 2021-14.80-номерлүү чечими менен кабыл алынган.

Бул нускама Камкорчулар кеңешинин 2017-жылдын 22-декабрындагы 2017-02/8- номерлүү чечими менен кабыл алынган.

Бул нускама Камкорчулар кеңешинин 2011-жылдын 30-сентябрындагы 2011-02/5-c номерлүү чечими менен кабыл алынган.