мыйзам

КЫРГЫЗ-ТҮРК “МАНАС” УНИВЕРСИТЕТИНИН МЕДИЦИНАЛЫК КЫЗМАТ КӨРСӨТҮҮ БОЮНЧА НУСКАМАСЫ

Максаты

1-берене. Бул нускаманын максаты – Кыргыз-Түрк “Манас” университетинин студенттерине, кызматкерлерине жана алардын үй-бүлөлөрүнө медициналык кызмат көрсөтүүнүн тартибин аныктоо.

Мазмуну

2-берене. Бул нускама Кыргыз-Түрк “Манас” университетинин кызматкерлерин, алардын жубайлары менен 18 жашка чыга элек багуусунда же тарбиялануусунда болгон балдарын жана университеттин студенттерин камтыйт. Толук айыгып кетүүсү мүмкүн болбогондугун же эмгекке жарамсыздыгын тастыктаган документке (саламаттыкты сактоо мекемесинин маалым каты) ээ 18 жаштан ашкан кызматкердин балдары дагы ушул нускамада аныкталган медициналык кызмат көрсөтүүдөн пайдалана алышат.

Укуктук негиздеме

3-берене. Бул нускама Кыргыз-Түрк «Манас» университетинин Уставынын тийиштүү беренелерине ылайык иштелип чыккан.

Аныктамалар жана кыскартуулар

4-берене. Бул нускамада төмөнкүдөй түшүнүктөр колдонулат:

Мекеменин дарыгери : Ден соолук борборунда иштеген дарыгерлер;

Студент : Кыргыз-Түрк “Манас” университетинин орто жана жогорку   орто кесиптик билим берүү, ЖОЖдон кийинки билим берүү   программалары боюнча билим алган студенттер;

Кызматкер : Кыргыз-Түрк “Манас” университетинде толук айлык акы менен   иштеген кызматкерлер;

Ректор : Кыргыз-Түрк “Манас” университетинин Ректору;

Ректорат : Кыргыз-Түрк “Манас” университетинин ректораты;

Дарыгерлерден түзүлгөн               ден соолук комиссиясы : Кыргыз-Түрк “Манас” университетинин дарыгерлерден түзүлгөн   ден соолук комиссиясы;

Ден соолук борбору : Кыргыз-Түрк “Манас” университетинин ден соолук борбору;

Университет : Кыргыз-Түрк “Манас” университети;

Жардамчы медициналык                       кызматкерлер : Ден соолук борборунда иштеген медайымдар, жабдуулар   менен иштеген медициналык адистер жана лаборанттар.

Ден соолук борбору

5-берене. Бул нускаманын мазмунунда камтылган адамдарга медициналык жардам көрсөтүү жана дарылоо максатында түзүлгөн борбор.

Ден соолук борборунда ректорат тарабынан дайындалган мүдүр жана зарыл болгон адис-тиктер боюнча адис-дарыгерлер менен жардамчы медициналык кызматкерлер иштейт.

Ден соолук борборунда ооруга диагноз коюу жана дарылоо максатында көрсөтүлгөн кээ бир кызматтар (рентген, кан менен заара анализдери, УЗИ, ЭКГ ж.б.) жана сарпталуучу материалдарга кеткен чыгымдар үчүн кошумча төлөм алынат. Ар бир каржы жылынын башында кошумча төлөмдүн наркы университеттин Башкаруу кеңеши тарабынан аныкталат.

Бейтапты дарыланууга жиберүү жана ишке жарамсыздык баракчасы

6-берене. Университеттин кызматкери иштеген бөлүмүнөн, ал эми студенттер окуган факультетинен алынган жолдомо баракча менен Ден соолук борборуна медициналык кароодон өтүү үчүн кайрыла алышат. Бул жолдомо баракчада бейтаптын аты-жөнү, иштеген/окуган жери, кызматы, кызматкердин/студенттин жеке номери, дареги, ошондой эле тийиштүү бөлүм башчынын аты-жөнү, датасы ж.б. маалыматтар камтылат. Ден соолук борборунда бейтаптын дарылануусу мүмкүн болбогон учурда, ал башка саламаттыкты сактоо мекемелерине жиберилиши мүмкүн.

Ден соолук борборунун мүдүрлүгү иш убактысынан сырткары убакта алгачкы медициналык жардам, керектүү дарылоо жүргүзүү, зарыл болгон учурда бейтапты ооруканага дарыланууга жиберүү, жеткирүү, жайгаштыруу, ошондой эле бейтаптын ооруканада медициналык кароо-дон өтүүсү, дарылануусу жана ооруканага жаткырылышы сыяктуу медициналык кызмат көрсөтүлүшү үчүн дем алыш, майрам күндөрүндө да кызматкер нөөмөт менен 24 саат бою иштегендей шарт түзөт. Дем алыш күндөрү жана иштен сырткары убактарда нөөмөтчүлүктүн уюштурулушу боюнча чечимди Ден соолук борборунун мүдүрлүгү чыгарат.

Дарыгер бейтаптын жолдомо баракчасын негизсиз деп тапкан учурда жана ал универси-теттин Ден соолук борборуна эмес, башка саламаттыкты сактоо мекемелерине кайрылып, бул нускаманын 7-8-беренелерине ылайык келбегендей дарыланса, ишке жарамсыздык баракчасы кабыл алынбайт жана каралбайт.

Тез жардам көрсөтүү муктаждыгы пайда болгон учурда жогоруда белгиленген шарттар коюлбайт.

Тийиштүү жетекчилик тарабынан аныкталган саламаттыкты сактоо мекемелери өлкө ичинде кызматкерди дарылоого мүмкүн эместигин документтер менен тастыктаса, ал кызматкерге чет өлкөдө дарыланууга уруксат берилет. Кызматкердин чет өлкөдө дарылануусу универси-теттин Башкаруу кеңешинин чечими жана финансылык документтерге кол коюу укугуна ээ жетекчинин макулдугу менен кабыл алынат. Мындай учурда дарыланууга жолдомо алган оорулуунун жол жана күнүмдүк чыгымдары, ошондой эле аны коштоп баруучунун жол чыгымы төлөнүп берилет.

Кызматкер жана студент иштеген/окуган жеринен сырткары жерде ооруп калганда 

7-берене. Иш сапарга жөнөтүлгөн жана иштеген жеринен алыс жерде эс алуу укугун колдонгон кызматкер менен расмий эс алуу күндөрүндө университеттен башка жерде жүргөн учурда студенттер ошол жердеги саламаттыкты сактоо мекемелерине кайрылып дарылана алышат. Бул учурда университеттен сырткары жердеги саламаттыкты сактоо мекемелеринен алынган ишке жарамсыздык баракчасы тийиштүү бөлүм аркылуу Ден соолук борборунун мүдүрлүгүнө жиберилет. Бул ишке жарамсыздык баракчасы Ден соолук борборунун макулдугу менен кабыл алынат.

Маалымат берүүнүн зарылдыгы

8-берене. Бул нускаманын 6-беренесине ылайык стационардык шартта дарылангандар жана 7-беренеге ылайык амбулатордук же стационардык шартта дарыланган кызматкер дарылануунун биринчи үч күнүнүн ичинде тийиштүү бөлүм аркылуу ректоратка маалымат бериши керек.

Рецептке жазыла турган дарылардын дозасы жана дарылануу чыгымдары

9-берене. Бул нускаманын тийиштүү жоболоруна ылайык келүү шарты менен студенттердин Ден соолук борборунан сырткары мамлекеттик саламаттыкты сактоо мекемелеринде тиш жана ооз көңдөйүн дарылоого байланыштуу чыгымдардын суммасы тууралуу чечим ар бир каржы жылынын башында университеттин Башкаруу кеңеши тарабынан кабыл алынат.

Студенттерге Ден соолук борборунда болгон дары-дармектердин жана медициналык материалдардын ичинен дарыгер тарабынан 5тен ашпаган санда дарылар жана медициналык каражаттар дарылануунун биринчи үч күнүнүн ичинде акысыз берилет.

Медициналык карточка

10-берене. Бул нускамага ылайык Ден соолук борборуна кайрылган ар бир жаңы адамга автоматташтырылган тутум аркылуу медициналык карточка ачылат. Бул медициналык кар-точкада бейтаптын кайсы оору менен ооруганы, кайсы дарыгерге көрүнгөнү, кайсы жерде жана кайсы убакта дарылангандыгы, дарылануунун ыкмасы жана колдонулган дары-дармектер жөнүндө маалыматтар жазылат.

Медициналык карточканы текшерүү боюнча жооптуу кишилерден башка эч ким медици-налык карточкаларды карай албайт жана анын ичиндеги маалыматтарды башка бирөөлөргө айтпайт.

Күчүнө кириши

11-берене. Бул нускама Кыргыз-Түрк “Манас” университетинин Камкорчулар кеңеши тарабынан бекитилген күндөн баштап күчүнө кирет. Бул нускаманын беренелерине каршы келген университеттин Башкаруу жана Окумуштуулар кеңештеринин чечимдери күчүн жоготот.

Ишке ашырылышы

12-берене. Бул нускамадагы жоболор Кыргыз-Түрк “Манас” университетинин ректораты тарабынан жөнгө салынат.

Бул нускама 2014-жылдын 22-декабрында Кыргыз-Түрк “Манас” университетинин Камкорчулар кеңешинин 2014-02/7-номерлүү чечими менен кабыл алынган.