мыйзам

КЫРГЫЗ-ТҮРК “МАНАС” УНИВЕРСИТЕТИНИН ДОКТОРАНТУРА ПРОГРАММАСЫ БОЮНЧА ЧЕТ ӨЛКӨДӨ ИЛИМИЙ-ИЗИЛДӨӨЧҮЛҮК ПРАКТИКАНЫ ИШКЕ АШЫРУУ ЖӨНҮНДӨ ЖОБОСУ

Максаты:

1-берене: Бул жобонун максаты - Кыргыз-Түрк “Манас” университетине караштуу институттарда докторантура программалары боюнча милдеттүү түрдө чет өлкөдө илимий-изилдөөчүлүк практикадан өтүүгө байланыштуу жол-жоболорду аныктоо.

Мазмуну:

2-берене: Бул жобо Кыргыз-Түрк «Манас» университетине караштуу институттарда докторантура программалары боюнча милдеттүү түрдө чет өлкөдө илимий-изилдөөчүлүк практикадан өтүүгө байланыштуу жол-жоболорду камтыйт. 

Укуктук негиздеме:

3-берене: Бул жобо Кыргыз-Түрк “Манас” университетинин докторантура программасын ишке ашыруу жөнүндөгү жобосунун 7-, 8- жана 17-беренелеринин негизинде даярдалган.

Аныктамалар:

4-берене: Бул жободо төмөнкүдөй түшүнүктөр колдонулат:

·             Университет: Кыргыз-Түрк “Манас” университети;

·             Камкорчулар кеңеши: Кыргыз-Түрк “Манас” университетинин Камкорчулар кеңеши;

·             Ректор: Кыргыз-Түрк “Манас” университетинин Ректору;

·             Институт: Кыргыз-Түрк “Манас” университетинде ЖОЖдон кийинки билим берүү программаларын жүзөгө ашырган институт;

·             Институттун илимий тармагы: Институтта ЖОЖдон кийинки билим берүү программалары ачылган илимий тармак;

·             Куратор: Институтка катталган студенттерге сабак окуу жана диссертация жазуу боюнча багыт берүү үчүн дайындалган окутуучу; 

·             Чет өлкөдө илимий-изилдөөчүлүк практикадан өтүү: Докторантура программасы боюнча чет өлкөдөгү илимий-изилдөөчүлүк практикасы.

Илимий-изилдөөчүлүк практиканын аныктамасы, убактысы жана мөөнөтү:

5-берене: (1) Чет өлкөдөгү илимий-изилдөөчүлүк практика – бул докторанттын чет өлкөдөгү ЖОЖдордо, илимий лабораторияларда, илимий-изилдөө жана тажрыйба-конструктордук иштерди жүргүзгөн уюмдарда, музейлерде, китепканаларда ж.б.у.с. жайларда диссертациялык ишине байланыштуу илимий изилдөөлөрдү жүргүзүүгө, билимин жана тажрыйбасын өркүндөтүүгө багытталган иш-чаралары.

(2)        Диссертациянын план-проспектиси кабыл алынган студент максималдуу мөөнөттүн бүтүшүнө бир семестр калганда чет өлкөдө илимий-изилдөөчүлүк практикадан өтүшү керек; 

(3)        Илимий-изилдөөчүлүк практиканын мөөнөтү – бир ай. Бирок бул мөөнөт докторанттын каалосу жана кураторлорунун макулдугу менен узартылышы мүмкүн;

(4)        Өз мөөнөтүндө чет өлкөдө илимий изилдөөчүлүк практикадан өтпөгөн же аны бүтүрө албаган же болбосо ийгиликтүү тапшыра албаган студент институттан чыгарылат.

Илимий-изилдөөчүлүк практика өтө турган жердин аныкталышы жана докторантка жардам берүү:

6-берене: (1) Илимий-изилдөөчүлүк практикадан өтө турган жерди докторант өзү аныктайт. Студент чет өлкөдө илимий изилдөөчүлүк практикадан өтө турган жерден кабыл же чакыруу жазуусун алганда, бул жердин ылайыктуу болуп-болбогону тууралуу чечимди институттун мүдүрүнүн орун басарынан, тийиштүү илимий тармактын жетекчисинен жана куратордо турган комиссия кабыл алат;  

(2)        Илимий-изилдөөчүлүк практикадан өтө турган жери кабыл алынган студент паспорттун көчүрмөсүн жана арызын институттун мүдүрлүгүнө тапшырат;

(3)        Чет өлкөдө илимий-изилдөөчүлүк практикадан өтүү боюнча арызы кабыл алынган студенттин эки тараптуу учак билети институттун башкаруу кеңешинин сунушу боюнча университеттин башкаруу кеңешинин чечиминин негизинде университет тарабынан каржыланат;

(4)        Стипендия алып окуган студентке практика учурунда да стипендия берилет.

Илимий-изилдөөчүлүк практика өтүү жана аны баалоо:

7-берене: (1) Докторант илимий-изилдөө иштерин практикадан өткөн мекеменин лабораториясында, устаканасында, өндүрүштүк борборунда жана китепканасында жүргүзө алат. Практика учурунда өзүнүн адистиги боюнча илимий изилдөө, семинар, симпозиум ж.б. иш-чараларга, ошондой эле өзүнүн өнүгүшүнө салым кошо турган сабактарга, жайкы мектептин сабактарына жана тил курстарына катыша алат;

(2)        Докторант илимий-изилдөөчүлүк практикадан өтүү учурунда жасаган бардык иштерин “Чет өлкөдө илимий-изилдөөчүлүк практикадан өтүү тууралуу отчетко” жазат жана ага түзүмдүн жетекчисинин колун койдурат;

(3)        Докторант илимий-изилдөөчүлүк практикадан өткөндөн кийин бир айдын ичинде институттун мүдүрлүгүнө тийиштүү отчетун тапшырат.

Башка жагдайлар:

8-берене: (1) Илимий-изилдөөчүлүк практикадан өтүү үчүн чет өлкөгө кетип, кайра кайтып келбеген студент Кыргыз-Түрк “Манас” университети тарабынан сатып алынган билеттин баасын 20%дан ашыгы менен төлөйт.

(2)        Илимий-изилдөөчүлүк практикадан өтүү учурунда студент келтирген зыяндар үчүн Кыргыз-Түрк ”Манас” университети жооптуу эмес.

(3)        Кыргыз-Түрк “Манас” университетинин Студенттердин тартиби боюнча нускамасы илимий-изилдөөчүлүк практикадан өтүү учурунда да күчүндө болот.

Күчүнө кириши:

9-берене: Бул жобо Кыргыз-Түрк “Манас” университетинин Камкорчулар кеңеши тарабынан бекитилген күндөн тартып күчүнө кирет.

Аткарылышы:

10-берене: Бул жобо Кыргыз-Түрк “Манас” университетинин Ректору тарабынан ишке ашырылат.

Бул жобо Кыргыз-Түрк “Манас” университетинин Камкорчулар кеңешинин 2022-жылдын 28-декабрындагы  №2022-01/16-чечими менен кабыл алынды.

Бул жобо Кыргыз-Түрк “Манас” университетинин Окумуштуулар кеңешинин 2022-жылдын 10-ноябрындагы №2022-19.80 (c)-чечими менен Камкорчулар кеңешинин бекитүүсүнө сунуштоо максатында кабыл алынды.