мыйзам

КЫРГЫЗ-ТҮРК “МАНАС” УНИВЕРСИТЕТИНИН МҮМКҮНЧҮЛҮГҮ ЧЕКТЕЛГЕН СТУДЕНТТЕРДИ КОЛДОО БЮРОСУ ЖӨНҮНДӨ ЖОБОСУ

БИРИНЧИ БӨЛҮМ

Жалпы жоболор

Максаты

1-берене. Бул жобонун максаты – Кыргыз-Түрк “Манас” университетинин мүмкүнчүлүгү чектелген студенттерге колдоо көрсөтүү, алардын окуу процессине толук катышуусун камсыз кылуу жана коомдук турмушу үчүн керектүү чараларды көрүү максатында ректораттын алдында түзүлгөн КТМУнун мүмкүнчүлүгү чектелген студенттерди колдоо бюросунун иштөө принциптерин аныктоо.

Мазмуну

2-берене. Бул жобо Кыргыз-Түрк “Манас” университетинде окуган жана кандайдыр бир майыптыгынан улам өзгөчө муктаждыктары бар студенттерге колдоо көрсөтүү боюнча бюронун укуктарын жана милдеттерин камтыйт.

Укуктук негиздеме

3-берене. Бул жобо Кыргыз-Түрк «Манас» университетинин Уставынын тийиштүү беренелерине негизделип даярдалган.

Аныктамалар жана кыскартуулар

3-берене. Бул жободо төмөнкүдөй түшүнүктөр колдонулат:

ЭКИНЧИ БӨЛҮМ

Кыргыз-түрк “Манас”  университетинин мүмкүнчүлүгү чектелген студенттерди колдоо бюросунун башкаруу органдары жана милдеттери

Кыргыз-Түрк “Манас” университетинин мүмкүнчүлүгү чектелген студенттерди колдоо бюросунун башкаруу органдары

5-берене. КТМУнун мүмкүнчүлүгү чектелген студенттерди колдоо бюросунун башкаруу органдары төмөнкүдөй:

a)               КТМУнун мүмкүнчүлүгү чектелген студенттерди колдоо бюросунун координатору;

b)              КТМУнун мүмкүнчүлүгү чектелген студенттерди колдоо комиссиясы.

Координатор

6-берене. Комиссиянын ишин координациялоо үчүн тийиштүү тажрыйбага ээ университеттин окутуучуларынын ичинен координатор тандалып, Ректор тарабынан Биринчи проректордун макулдугу менен үч жылдык мөөнөткө дайындалат. Мөөнөтү аяктаган координатор жогорудагы усул боюнча кайрадан дайындалышы мүмкүн.

Координатордун милдеттери

7-берене. Координатордун милдеттери төмөнкүдөй:

a)           Бюронун иш-чараларынын планын түзүү, аны ишке ашыруу жана өткөрүлгөн иш-чаралар тууралуу жылдык отчетту даярдап Биринчи проректорго сунуштоо;

b)          Комиссиянын үзгүлтүксүз иштөөсүн камсыздоо;

c)           Университеттин факультеттеринде/ институттарында/ жогорку мектептеринде/ башкармалыктарында иштеген жооптуу кишилер менен кызматташуу;

d)          Тийиштүү тармак боюнча университеттин ченемдик укуктук документтеринин алкагында башка милдеттерди аткаруу.

КТМУнун мүмкүнчүлүгү чектелген студенттерди колдоо комиссиясы

8-берене. Аталган комиссия Биринчи проректордун жетекчилигинде түзүлүп, координатордон, Окумуштуулар кеңешинин макулдугу менен университеттин академиялык/ административдик кызматкерлеринин ичинен тандалган 3 мүчөдөн, башкармалыктардын ичинен тандалган бир мүчөдөн, мүмкүнчүлүгү чектелген студенттердин ичинен тандалган 1 мүчөдөн, “Баалоо, тандоо жана жайгаштыруу борбору”нун башчысы менен “Студенттердин инсандык өнүгүү жана кеңешүү борборунун” мүдүрүнөн турат.

Комиссиянын төрагасы болбогон учурда комиссияга координатор жетекчилик кылат. КТМУнун мүмкүнчүлүгү чектелген студенттерди колдоо комиссиясынын мүчөлөрүнүн кызмат мөөнөтү – үч жыл. Кызмат мөөнөтү аяктаган комиссиянын мүчөсү кайрадан шайланышы мүмкүн. Мөөнөтү аяктабай мүчөлүктөн чыккан мүчөнүн ордуна калган мөөнөтүн өтөө үчүн жаңы мүчө дайындалат.

Комиссиянын милдеттери

9-берене. Комиссиянын милдеттери төмөнкүдөй:

a)           Мүмкүнчүлүгү чектелген студенттердин университеттеги иш-чараларга толук кандуу катышуусу үчүн керектөөлөрүн камсыздоо, керектүү чараларды көрүү жана тийиштүү иштерди жүргүзүү менен бирге маселелерди чечүүнүн жолдорун издөө;

b)          Мүмкүнчүлүгү чектелген студенттерди окуу-тарбиялык, физикалык, психологиялык жана коомдук турмушуна тоскоол болбогон окуу чөйрөсү жана окуу материалдары менен камсыз кылуу, алардын тийиштүү билим алуусу, изилдөө жүргүзүүсү жана жашоо чөйрөсүн камсыздоо боюнча чечимдерди кабыл алуу;

c)           Бардык түзүмдөрдөгү мүмкүнчүлүгү чектелген студенттерге ылайыкташтыруу иш чараларын көзөмөлдөө, мүмкүнчүлүгү чектелген студенттер боюнча кабыл алынган чечимдердин жана аныкталган стратегиялардын ишке ашырылып жатканын текшерүү;

d)          Майыптуулук боюнча алдын алуу, маалымат берүү жана өнүктүрүү жаатында окуу-тарбиялык иш-чараларды даярдоо жана өткөрүү.

Бюро

10-берене. Биринчи проректордун жетекчилигинде түзүлүп, координатордон жана катчылыкта иштеген кызматкерден турат.

Факультеттерде декандын орун басары же декан тарабынан дайындалган бир окутуучу, институтта жана жогорку мектептерде мүдүрдүн орун басары же мүдүр тарабынан дайындалган бир окутуучу, башкармалыктарда бир бөлүмдүн мүдүрү тийиштүү факультетте/ жогорку мектепте/ институтта/ башкармалыкта жооптуу катары милдет аткарат. Жооптуу кишилер кабыл алынган чечимдердин түзүмдөрдө жүзөгө ашырылышын, аткарылган иш-чаралардын текшерилишин жана түзүмдөгү мүмкүнчүлүгү чектелген студенттердин муктаждыктарын канааттандырууну камсыздайт.

Бюронун милдеттери

11-берене. Бюронун милдеттери төмөнкүдөй:

a)           КТМУга кабыл алынып, алгачкы жолу каттоодон өтүп жаткан учурунда мүмкүнчүлүгү чектелген студенттерди аныктоо;

b)          Мүмкүнчүлүгү чектелген студенттердин абалын, көйгөйлөрүн билүү жана аларды чечүү үчүн изилдөө жүргүзүү жана долбоорлорду иштеп чыгуу;

c)           Тийиштүү түзүмдүн милдетине жана иш чөйрөсүнө кирген маселелер боюнча басылма, документ жана маалыматтарды камтыган, мүмкүнчүлүгү чектелген студенттердин көйгөйлөрү жана суроо-талаптарын жеткире турган, тийиштүү түзүм менен байланыш түзүү мүмкүнчүлүгүн камсыздаган веб-баракчаны түзүү;

d)          Маалымат берүү максатында университеттин бардык студенттерине, ошондой эле академиялык/ административдик кызматкерлерине майыптуулук жана мүмкүнчүлүгү чектелгендер үчүн аткарылышы керек болгон иш-чаралар тууралуу маалымат берүүчү документтерди даярдоо, семинарларды, конференцияларды ж.б. иш-чараларды өткөрүү; зарыл учурларда квалификацияны жогорулатуу курстарын уюштуруу;

e)           Материалдык абалы начар мүмкүнчүлүгү чектелген студенттердин жардамчы каражаттар менен акысыз түрдө камсыздалышы боюнча иш-чараларды алып баруу;

f)            Мүмкүнчүлүгү чектелген студенттерге сынак уюштурууда алардын майыптыгына жараша өздөрүнүн каалоосу боюнча жардамчы киши дайындоо, сынактын мөөнөтү жана өткөрүлүүчү жери, сынак материалдары жана сынакты ишке ашыруу боюнча тийиштүү алдын алуу чараларын көрүү жана жөнгө салуу;

g)           Мүмкүнчүлүгү чектелген студенттердин көйгөйлөрү тууралуу жыйындарды уюштуруу;

h)          Мүмкүнчүлүгү чектелгендердин жумалыгында майыптуулукту алдын алуу,  мүмкүнчүлүгү чектелген  кишилердин көйгөйлөрү жана билим алуусу тууралуу конференцияларды уюштуруу, радио жана телекөрсөтүү программаларын иштеп чыгуу;

i)            Бүткүл дүйнөлүк майыптар күнүндө университеттин веб-баракчасында билдирүү жасоо жана университеттеги мүмкүнчүлүгү чектелген студенттерге мотивация берүүчү жыйындарды уюштуруу;

j)            Мүмкүнчүлүгү чектелген жарандарга тиешелүү ченемдик укуктук документтер жана иш-аракеттер боюнча тийиштүү органдар менен кызматташуу жолдорун табуу.

ҮЧҮНЧҮ БӨЛҮМ

Күчүнө кириши жана ишке ашырылышы

Күчүнө кириши

12-берене. Бул жобо, Кыргыз-Түрк “Манас” университетинин Окумуштуулар кеңеши тарабынан кабыл алынган күндөн тарта күчүнө кирет.

Ишке ашырылышы

13-берене. Бул жобо, Кыргыз-Түрк “Манас” университети­нин ректораты тарабынан ишке ашырылат.

Бул жобо, Кыргыз-Түрк “Манас” университетинин Окумуштуулар кеңешинин 2019-жылдын 20-июнундагы 2019-10.50-номерлүү чечими менен кабыл алынган.